နားထောင်တိုင်းလည်း မကြားပါ။ ကြားတိုင်းလည်း နားမလည်ပါ (၂)

အင်္ဂလိပ်စကားလုံးတို့ ၏ အသံထွက်တွင်ရှိသည့် ဖိသံstress သဘောကို “နားထောင်တိုင်းလည်း မကြားပါ။ ကြားတိုင်းလည်း နားမလည်ပါ” ဆောင်းပါးတွင်ပြောခဲ့ပါသည်။ စာကြောင်းတွင်ပါသည့် ဖိသံသဘော ကို ဆက်ပါမည်။

စာကြောင်းတစ်ကြောင်းကိုရွတ်ဆိုရာတွင်လည်း ဖိသံပါသည်။ ဥပမာအားဖြင့် I went to school. ကိုပြောရာတွင် went နှင့် school ကို အခြား I နှင့် to တို့ ထက် ပိုရှည်ရှည်နှင့် ကျယ်ကျယ် ပြော လေ့ရှိပါသည်။ အများအားဖြင့် နာမ်၊ ကြိယာ စသည့် အချက်အလက်ကိုဖော်ပြသည့် content words ဟု ပညာရှင်များကခေါ်ကြသော စာလုံးများကို နာမ်စား၊ ၀ိဘတ်စသည့် စာကြောင်းတည်ဆောက်သည့် function words ဟုပညာရှင်များကခေါ်ကြသော စာလုံးများထက် ပိုပြီး ကျယ်ကျယ် နှင့် ရှည်ရှည် ရွတ်တတ်ကြပါသည်။ အထက်ပါစာကြောင်းတွင် ဘယ်ကိုသွားသည်ဆိုသည့် အချက်အလက်ကို အသားပေးပြီး wentနှင့် school ကို ဖိသံဖြင့် ထွက်ပါသည်။ ဤသဘောကိုသိလျှင် နားထောင်ရာတွင် ဖိသံနှင့် ထွက်သည့်စကားလုံးများကိုပိုပြီး သတိပြုလျှက် ကြားအောင်နားထောင်သင့်ပါသည်။

နားထောင်ကျင့်နည်းသေးလျှင် မည်သည့်စကားလုံးများကို ဖိသံနှင့် ထွက်သွားသည်ကို အလွယ်တကူဖမ်းမိဦးမည် မဟုတ်ပါ။ ထို့ ပြင် စာကြောင်းများတွင် စကားလုံးတစ်လုံးနှင့်တစ်လုံးကို တစ်ဆက်တည်း ရွတ်သွားသည်ကိုလည်း နားယဉ်ဦးမည်မဟုတ်ပါ။ ထို့ကြောင့် အကြားစွမ်းရည်တိုးတက် လိုလျှင် များများနားထောင်၍ လေ့ကျင့်ခြင်းမှတပါး အခြားမရှိပါ။

သို့ သော် အကြားစွမ်းရည်စတင်လေ့ကျင့်သူများအတွက် နောက်ထပ်အခက်အခဲများရှိတတ်ပါသည်။ အသံထွက်ကို ဖမ်းမိသော်လည်း စကားလုံးကို မသိမမြင်ထားဘူးလျှင် ဘာဆိုလိုသည်ကိုသိမည်မဟုတ်ပါ။ စကားလုံးကို မြင်ထားဘူးသော်လည်း ၎င်း၏အဓိပ္ပာယ်နှင့် သုံးပုံသုံးနည်းကို မသိထားလျှင်လည်း ကြားသာကြားလိုက်သော်လည်း နာလည်မည်မဟုတ်ပါ။

ထို့ ကြောင့် အင်္ဂလိပ်စာ ဝေါဟာရကြွယ်အောင် အားထုတ်ထားသင့်ပါသည်။ အဖတ်စွမ်းရည်လေ့ကျင့်ရာတွင် တွေ့ရသော ဝေါဟာရအသစ်များ၏ အသံထွက်များကိုသိပြီး ကိုယ်တိုင် ထွက်နိုင်သည့်အထိ အားထုတ်သင့်ပါသည်။ သို့မှသာ နားထောင်ရာတွင် ထိုစကားလုံးအသစ်ကို ကြားသည့်အခါ၌ “မိ” နိုင်ပါမည်။ အဘိဓာန်ပါ အသံထွက် သင်္ကေတများဖြင့် စကားလုံးတိုင်း၏ အသံထွက်ကို သိနိုင်ကြောင်းပြောခဲ့ပြီးပါပြီ။ အွန်လိုင်းအဘိဓာန်များတွင်လည်း အသံထွက်အမှန်ကို နားထောင်နိုင်ပါသည်။ ထို့ ပြင် စကားလုံးအသစ်၏အဓိပ္ပာယ်နှင့် သုံးပုံသုံးနည်းကိုလည်း တစ်ပါတည်း သိအောင်ကြိုးစားရပါမည်။ ဝေါဟာရကြွယ်ဝခြင်းက စာဖတ်ခြင်းနှင့်နားထောင်ခြင်းကိုများစွာ အထောက်အကူ ပေးပါသည်။

အကြားစွမ်းရည်လေ့ကျင့်ရာတွင် ဝေါဟာရအခက်အပြင် တွေ့ရမည့် အခြားအခက်တစ်ခုမှာ မြန်နှုန်း နှေးနှုန်း ဖြစ်ပါသည်။ နှေးနှေးပြောသည့် အပြောကို နိုင်ငံခြားဘာသာစကားလေ့လာသူများအဖို့  ပို၍ နားလည်နိုင်မည်ဆိုသည်မှာ ပြောဖို့လိုမည်မထင်ပါ။ ထို့ကြောင့် နှေးနှေးပြောသည့် စကားပြောမျိုးကိုနားထောင်ပြီး စတင်လေ့ကျင့်သင့်ပါသည်။ ၎င်းစကားပြောမျိုးကို  အင်တာနက်တွင်ရှာနိုင်ပါသည်။ ဂူဂဲလ် Google စာမျက်နှာ search box “ ရှာကွက်”တွင် Listening Exercises for English Language Learners ဟုစာရိုက်ရှာကြည့်ပါ။ ဘီဘီစီ ဗီအိုအေ အင်္ဂလိပ်စာသင်ခန်းစာ စာအိမ်များတွင်လည်း နှေးနှေးပြောထားသည့် စကားပြောများကို နားထောင်နိုင်ပါသည်။

http://www.bbc.co.uk/worldservice/learningenglish/

http://www.voanews.com/learningenglish/home/

၎င်းအင်္ဂလိပ်စာသင်ခန်းစာ စာအိမ်များ၏ အားသာချက်တစ်ခုမှာ ပြောသည့်အကြောင်းကို မှတ်တမ်း တင်ထားပြီးဖြစ်သည်။ အသံဖိုင်စာရွက်ပေါ်တွင် Text ဟူသော အမှတ်အသားတစ်ခုရှိနေတတ်ပြီး ၎င်းကို ဖွင့်ဖတ်နိုင်ပါလိမ့်မည်။ ထိုစာဖိုင်အများစုမှာ PDF ဖိုင်များဖြစ်တတ်ပါသည်။ ထို့ကြောင့်  စာဖိုင်ကိုဖတ်လျှက် နားထောင်နိုင်ပါသည်။ ထို့နောက် စာဖိုင်မပါဘဲ အနည်းဆုံးနောက်ထပ်တစ်ကြိမ် နားထောင်နိုင်ပါသည်။ ထိုအခါထွက်သွားသည့်အသံထွက်များ၊ အကြောင်းအရာများနှင့် အသံနေအသံထားများ accent ကိုပါ လွယ်လင့်တကူ ကျက်မိသွားပါလိမ့်မည်။ နောက်ပိုင်း အကြားစွမ်းရည် တက်လာသည့်အခါ စာဖိုင်မပါဘဲ ကြားနိုင်ပါလိမ့်မည်။

ဤနေရာတွင် မေးခွန်းထုတ်စရာရှိလာပါသည်။ အပြင်လောကတွင် နားထောင်သည့်အခါ မည်သည့် စာဖိုင်မှမပါပါ။ ဘယ်သူမှ နှေးနှေးမပြောပါ။ ထို့ ပြင် ဘာသာစကားလေ့လာသူများအတွက် စီစဉ်ထားသော သင်ခန်းစာများတွင် ပြောထားသည့်အပြောသည် အပြင်လောကတွင်ပြောသည့် အပြောများနှင့် ထပ်တူမကျပါ။ ထို့ကြောင့် ယခုကဲ့သို့ လေ့ကျင့်ထားခြင်းမျိုးက အကူအညီပေးနိုင်ပါမည်လားဟု မေးခွန်းထုတ်စရာရှိပါသည်။ အကူအညီပေးနိုင်ပါသည်ဟု ဘာသာဗေဒပညာရှင်များက ဆိုကြပါသည်။

သို့သော် ထိုပညာရှင်များစကားဖြင့် မကျေနပ်သင့်ပါ။ ထိုသို့ သင်ခန်းစာနားထောင်ခြင်မျိုးကို လေ့ကျင့်နေသည့် တစ်ချိန်တည်းတွင် နေ့စဉ်အပြင်လောကရှိ နားထောင်စရာများကိုလည်း တစ်နေ့နည်းနည်းစီ နားထောင်သွားသင့်ပါသည်။ (ဥပမာ သတင်း ရုပ်ရှင်) သို့မှသာ တစ်ဦးနှင့်တစ်ဦး စကားပြောသောအခါတွင်လည်းကောင်း ရုပ်ရှင်ဂီတစသည့် ဖျော်ဖြေစရာများနှင့် သတင်းမိန့်ခွန်းစသည့် အချက်အလက်တို့ကို နားထောင်ရာတွင်လည်းကောင်း အမှန်တကယ်ကြားပြီးနားလည်နိုင် အောင်ပြင်ဆင်ပြီး ဖြစ်ပါလိမ့်မည်။

ရေးသားသူ - ကျော်ဝင်းထွန်း

Posted by ကိုတူး(မိတ္ထီလာ GTI)