နိုင်ငံခြားငွေ လဲလှယ်ရောင်းဝယ်ရေးကောင်တာများ စတင်ဖွင့်လှစ်

အောက်တိုဘာ ၁ ရက်မှစ၍ နိုင်ငံခြားငွေ လဲလှယ်ရောင်းဝယ်ရေး ကောင်တာများ တရားဝင်ဖွင့်လှစ် ဆောင်ရွက်ခွင့်ပြုမည်ဖြစ်ကြောင်း သိရသည်။ အဆိုပါ နိုင်ငံခြားငွေ လဲလှယ်ရောင်းဝယ်ရေး ကောင်တာများတွင် အမေရိကန်ဒေါ်လာ၊ ယူရို၊ စင်ကာပူဒေါ်လာနှင် FEC များကို မြန်မာကျပ်ငွေဖြင့် လဲလှယ်ရောင်းဝယ်နိုင်မည် ဖြစ်သည်။

နိုင်ငံတော်အတွင်း ဝင်ရောက်လာသော နိုင်ငံခြားခရီးသွားဧည့်သည်များ ငွေလဲလှယ်ရာတွင် အဆင်ပြေစေရေးအတွက်လည်းကောင်း၊ ပြည်ပသို့သွားရောက်မည့် နိုင်ငံသားများ လိုအပ်သည့်နိုင်ငံခြားငွေများ တရားဝင်ဝယ်ယူနိုင်ရန်အတွက် လည်းကောင်း၊ မြန်မာနိုင်ငံတွင် နိုင်ငံခြားငွေဈေးကွက်ကို စနစ်တကျအကျိုးတူ ဆောင်ရွက်နိုင်ရန် လည်းကောင်း၊ တရားမဝင် နိုင်ငံခြားငွေ ရောင်းဝယ်မှုများ ပပျောက်စေရန်နှင့် နိုင်ငံခြားငွေလဲလှယ်နှုန်းများ တည်ငြိမ်စေရန်အတွက် လည်းကောင်း မြန်မာနိုင်ငံတော် ဗဟိုဘဏ်သည် ပုဂ္ဂလိကဘဏ် ခြောက်ခုသို့ နိုင်ငံခြားငွေများ ဝယ်ယူရောင်းချခွင့်လိုင်စင် (Money Changer License) များအား ဥပဒေ စည်းမျဉ်းစည်းကမ်းများနှင့်အညီ ထုတ်ပေးခဲ့ခြင်းဖြစ်သည်။

လိုင်စင်ရထားသည့် ဘဏ်များအနေဖြင့် အောက်တိုဘာ ၁ ရက်မှစ၍ နိုင်ငံခြားငွေ လဲလှယ်ရောင်းဝယ်ရေး ကောင်တာများကို ရန်ကုန်မြို့ ဗိုလ်တထောင်မြို့နယ် သိမ်ဖြူလမ်း အမှတ် (၉၉/၁၀၃) တွင် ဖွင့်လှစ်ဆောင်ရွက်ခွင့် ရရှိခဲ့ကြသည်။ ရောင်းဝယ်ခွင့်ပြုသည့် ဘဏ်များမှာ မြဝတီဘဏ်၊ အင်းဝဘဏ်၊ ကမ္ဘောဇဘဏ်၊ သမဝါယမဘဏ်၊ မြန်မာ့စက်မှုလက်မှု ဖွံ့ဖြိုးရေးဘဏ်နှင့် မြန်မာအရှေ့တိုင်းဘဏ်တို့ ဖြစ်ကြောင်းဖြင့် စက်တင်ဘာ ၂၉ ရက် နံနက်ပိုင်းတွင် ရန်ကုန်မြို့ ဗိုလ်တထောင်မြို့နယ် သိမ်ဖြူလမ်းရှိ နိုင်ငံခြားငွေ လဲလှယ်ရောင်းဝယ်ရေးကောင်တာ၌ ကျင်းပသည့် နိုင်ငံခြားငွေ ဝယ်ယူရောင်းချခွင့်လိုင်စင် ထုတ်ပေးသည့် အခမ်းအနား၌ မြန်မာနိုင်ငံတော် ဗဟိုဘဏ် ဥက္ကဋ္ဌ ဦးသန်းညိန်းက ပြောကြားသွားခဲ့သည်။

အဆိုပါအခမ်းအနားတွင် မြန်မာနိုင်ငံတော်ဗဟိုဘဏ်ဥက္ကဋ္ဌက နိုင်ငံခြားငွေများ ဝယ်ယူရောင်းချခွင့်ရ ပုဂ္ဂလိကဘဏ် ခြောက်ခ်ုအား နိုင်ငံခြားငွေများ ဝယ်ယူရောင်းချခွင့် လိုင်စင်များကိုလည်း ပေးအပ်ခဲ့ကြောင်း သိရသည်။ ယခုဖွင့်လှစ်ခွင့်ရသည့် နိုင်ငံခြားငွေ လဲလှယ်ရောင်းဝယ်ရေး ကောင်တာများတွင် အမေရိကန်ဒေါ်လာ၊ ယူရို၊ စင်ကာပူဒေါ်လာ နိုင်ငံခြားငွေသုံးမျိုးနှင့် နိုင်ငံခြားငွေလက်မှတ်  FEC များကို မြန်မာကျပ်ငွေဖြင့် တရားဝင် လဲလှယ်ရောင်းဝယ်နိုင်မည်ဖြစ်ပြီး ကောင်တာဈေးနှုန်းသတ်မှတ်ရေးအဖွဲ့က ဈေးကွက်လဲလှယ်နှုန်းနှင့်အပြိုင် နေ့စဉ်သတ်မှတ်သည့် ငွေလဲနှုန်းဖြင့် ရောင်းဝယ်သွားမည်ဖြစ်သည်။
Posted by အိမ်လွမ်းသူ